नागपंचमीच्या पावन पर्वावर नागदेवतेचे साक्षात दर्शन! यात्रा महोत्सवातून परतताना सौ. उमाताई तायडे यांच्या वाहनासमोर आला नाग; अनोख्या प्रसंगाची परिसरात चर्चा

मलकापूर/ पिंपळखुटा : नागपंचमीचा पवित्र दिवस… पिंपळखुटा येथील नागपंचमी यात्रा महोत्सवाचे दर्शन घेऊन सौ. उमाताई तायडे घरी परतत होत्या. रात्रीच्या शांत वातावरणात वाहनाने प्रवास सुरू असतानाच अचानक त्यांच्या गाडीसमोर नागदेवता प्रकट झाल्याचा अनुभव त्यांना आला. नागपंचमीच्या दिवशीच घडलेल्या या अनोख्या प्रसंगाने उमाताई तायडे यांच्यासह उपस्थितांच्या मनात श्रद्धेची भावना निर्माण झाली.
‘ज्या दिवशी नागदेवतेची पूजा केली, त्याच दिवशी प्रत्यक्ष नागदेवतेचे दर्शन झाले’, हा योगायोग की दैवी संकेत, अशी चर्चा आता परिसरात रंगू लागली आहे. या घटनेमुळे नागपंचमीचा दिवस त्यांच्या आयुष्यातील एक अविस्मरणीय दिवस ठरला आहे. सौ. उमाताई तायडे या केवळ माजी जिल्हा परिषद सदस्या म्हणून नव्हे, तर गरजूंच्या मदतीला धावून जाणाऱ्या सामाजिक कार्यकर्त्या म्हणून परिसरात परिचित आहेत. समाजातील अडचणीत असलेल्या कुटुंबांना मदत करणे, गरजूंना आधार देणे आणि सर्वसामान्यांच्या प्रश्नांसाठी आवाज उठविणे, हे त्यांचे सामाजिक कार्य सातत्याने सुरू आहे. त्यामुळे नागपंचमीच्या पावन पर्वावर घडलेल्या या अनोख्या प्रसंगाकडे अनेकजण त्यांच्या सामाजिक कार्याशी जोडून पाहत आहेत. सेवेची वाट चालणाऱ्या व्यक्तीला नागपंचमीच्या दिवशी नागदेवतेचे दर्शन घडणे, हा श्रद्धेचा विलक्षण अनुभव असल्याची भावना परिसरातून व्यक्त होत आहे. या घटनेची माहिती परिसरात पसरताच नागरिकांमध्येही या अनोख्या प्रसंगाची चर्चा सुरू झाली असून, नागपंचमीच्या दिवशी यात्रा दर्शनानंतर नागदेवतेचे साक्षात दर्शन हा विषय सध्या चर्चेचा ठरत आहे.