नांदुरा : शहरातील गांधी चौक परिसरात वाहन उभे करण्याच्या कारणावरून दोन व्यावसायिकांमध्ये वाद होऊन मारहाणीची घटना घडली. या प्रकरणी नांदुरा पोलिसांनी कापड व्यापाऱ्याविरुद्ध गुन्हा नोंदविला आहे. माहितीनुसार, सराफा व्यवसाय करणारे प्रवीण सुरेश उज्जैनकर (वय ५०) हे २२ फेब्रुवारी रोजी दुपारी बाहेरगावाहून परतल्यानंतर आपल्या घरासमोर कार उभी करून घरात गेले होते. त्यावेळी शेजारील कापड दुकानाचे मालक साहील रामचंदानी यांनी वाहन पार्किंगच्या मुद्द्यावरून त्यांना जाब विचारला. वाद वाढल्यानंतर रामचंदानी यांनी उज्जैनकर यांना मारहाण करून जीवे मारण्याची धमकी दिल्याचा आरोप तक्रारीत करण्यात आला आहे. यावरून नांदुरा पोलिसांनी संबंधिताविरुद्ध गुन्हा दाखल करून पुढील तपास सुरू केला आहे.
