बुलढाणा (प्रतिनिधी) – अलीकडे शस्त्र बाळगण्याची आणि भाईगिरी बळावल्याची क्रेझ वाढीस लागली आहे. बुलढाणा तालुक्यातील धाड येथे तत्पूर्वी भर चौकात तलवारीने ६ वेळा केक कापल्याप्रकरणी गुन्हा दाखल असलेल्या आरोपींनी चक्क लेखणीतून वाचा फोडणाऱ्या पत्रकाराला जीवे मारण्याची धमकी दिल्याचा प्रकार समोर आला आहे. दरम्यान आरोपी विरुध्द पोलिसांनी पत्रकार संरक्षण कायद्यान्वये गुन्हा दाखल केला आहे.पत्रकार वैभव मोहिते यांनी धाड पोलिसांना फिर्याद दिली की, २० सप्टेंबर रोजी रात्री दरम्यान मोहिते घरी असताना त्यांच्या घरासमोर दुचाकीस्वार आरोपींनी अश्लील शिवीगाळ करीत पत्रकार वैभव मोहिते यांना वृत्तपत्रात बातमी छापतो म्हणून जीवे मारण्याची धमकी दिली.अक्षय जीवनलाल बिलंगे व त्याचे मित्र रोशन गणेश शिंदे, शिवप्रसाद गुजर हे गुंड प्रवृत्तीचे असून त्यांची गावामध्ये गुंडगिरीमुळे दहशत पसरली आहे. त्यांच्याविरुध्द भर चौकात तलवारीने केक कापल्याचा गुन्हा दाखल आहे. अशा आशयाची तक्रार पत्रकार वैभव मोहिते यांनी दिल्यावरून आरोपी अक्षय बिलंगे (वय २२), रोशन गणेश शिंदे (वय १९), गोलू उर्फ शिवप्रसाद संजय गुजर (वय २३) सर्व रा. धाड यांच्याविरुध्द पोलिसांनी कलम २९६, ३५१(१), (३) ३ (५) बीएनएस नुसार गुन्हा दाखल केला आहे.
अधिक तपास ठाणेदार यांच्या मार्गदर्शनाखाली पीएसआय केंद्रे करीत आहेत.
तलवारीने केक कापण्याची बातमी दिल्याने पत्रकाराला जीवे मारण्याची धमकी, आरोपी विरुद्ध पत्रकार संरक्षण कायदा अंतर्गत गुन्हा दाखल!
