मलकापूर:- मलकापूरमध्ये निवडणुकीची चाहूल लागताच राजकारणाला पुन्हा एकदा ‘हिंदुत्व’चा रंग चढू लागला आहे. गेल्या विधानसभा निवडणुकीत हिंदुत्वचा गजर करत मतदारांच्या भावनांना साद घालणाऱ्या भाजपच्या नेत्यांनी सत्तेत आल्यानंतर विकासाचे आश्वासन मात्र जैसे थेच ठेवले, अशी चर्चा शहरात जोर धरू लागली आहे. एकीकडे वर्षभरात विकासकामांचा ठोस मागोवा दिसत नसताना दुसरीकडे पुन्हा त्याच हिंदुत्वाच्या मुद्द्यावर मत मागण्याचे राजकारण सुरू झाल्याचा आरोप नागरिक करताना दिसत आहेत. मलकापूर शहरात गेल्या काही दिवसांत सुरू झालेल्या राजकीय हालचालींमुळे पुन्हा एकदा ‘भाजपचे हिंदुत्व हे फक्त निवडणुकीपुरते’ असा सूर नागरिकांमध्ये उमटू लागला आहे. विधानसभा निवडणुकीत हिंदुत्वाच्या नारेबाजीवर विजयी ठरलेल्या आमदारांनी वर्षभरात कोणत्याही मोठ्या विकासकामाला सुरुवात केली नाही. शहरातील रस्ते, पाणीपुरवठा, ड्रेनेज, आरोग्य सुविधा आणि मूलभूत सार्वजनिक प्रश्न अद्याप प्रलंबित असल्याने नागरिकांची नाराजी वाढली आहे. “निवडणूक आली की हिंदुत्व जिवंत होते, पण निवडणुकीनंतर शहराच्या विकासाचा मुद्दा कायम बधिर राहतो.” अनेक भाविक आणि युवकांनीही राजकीय हिंदुत्व म्हणजे काय याचा सखोल अर्थच स्थानिक नेत्यांना माहित नसल्याची टीका केली आहे. दरम्यान, भाजप नेते मात्र याला विरोध करत विकासकामे नियोजनाधीन असल्याचे सांगत आहेत. परंतु जमिनीवरील वास्तव पाहता नागरिकांमध्ये भ्रमनिरास वाढत असून यावेळी मतदार अधिक सजग आणि प्रश्न विचारणारे झाले असल्याचे दिसून येत आहे. आगामी निवडणुकीत मतदार केवळ घोषणांवर नव्हे तर कामांच्या आधारे निर्णय देणार आहेत. हिंदुत्व नावाने गोंजारणाऱ्या राजकारणापेक्षा विकासाच्या ठोस धोरणांना प्राधान्य देण्याची वेळ आता सर्व पक्षांवर आली आहे. एकंदरीत, मलकापूरमध्ये भाजपच्या ‘हिंदुत्व’च्या राजकारणावर प्रश्नचिन्ह निर्माण होऊ लागले असून नागरिकांच्या मनात विकासाचा मुद्दा पुन्हा एकदा केंद्रस्थानी येताना दिसत आहे.
