मलकापूर :- शहर पोलिसांनी ऑनलाइन अमिष दाखवून नागरिकांची फसवणूक करणारी आणि लुटमार करणारी टोळी अवघ्या तीन तासांच्या आत जेरबंद करण्यात यश मिळवले आहे. दिनांक 18 नोव्हेंबर रोजी उल्हासनगर (जि. ठाणे) येथील तक्रारदाराने मलकापूर शहर पोलीस स्टेशनमध्ये फिर्याद दिली होती. तक्रारीनुसार, आरोपी प्रदीप सुरेश जैन (वय 38, रा. शास्त्रीनगर, मलकापूर) याने एक लाखाचे पाच लाख देतो असे आमिष दाखवून तक्रारदाराला उल्हासनगरहून मलकापूर येथे बोलावले. त्यानंतर तक्रारदार व त्याच्या मित्राला ऑटोत बसवून शहराबाहेरील सुनसान ठिकाणी नेण्यात आले. तेथे आरोपींनी संगनमत करून तक्रारदाराच्या गळ्यातील 20.6 ग्रॅम सोन्याची चैन (किंमत ₹1,50,000) आणि त्याच्या मित्राच्या खिशातील ₹40,000 रुपये मारहाण करून जबरदस्तीने हिसकावून घेतले. तसेच दोघांना जीवे ठार मारण्याची धमकीही दिली. या गुन्ह्यात प्रदीप जैन याच्या साथीदारांनीही सहभाग दिल्याचे उघड झाले असून त्यात निखील संजय भोसले (वय 25, रा. शिवाजीनगर, मलकापूर) सौरभ कैलास जैस्वाल (वय 25, रा. शिवाजीनगर, मलकापूर) विशाल विजय वानखेडे (वय 27, रा. मंगलगेट, मलकापूर) चेतन तानाजी व्यवहारे (वय 22, रा. शिवाजीनगर, मलकापूर) यांचा सहभाग आहे. तक्रारीचे गंभीरपणे दखल घेऊन मलकापूर पोलिसांनी आरोपींचा शोध सुरू केला. तक्रारदाराकडे असलेल्या फोटोच्या आधारे पथकाने आरोपी प्रदीप जैन याला शिताफीने ताब्यात घेतले. त्याच्या चौकशीनंतर उर्वरित चार आरोपींची नावे समोर आली. त्यानुसार वेगवेगळी पथके तयार करून सर्व आरोपींचा पाठलाग करण्यात आला आणि अवघ्या तीन तासांत सर्व पाच आरोपींना ताब्यात घेण्यात आले. चौकशीदरम्यान आरोपींनी लुटमारीची कबुली दिली असून, तक्रारदाराकडील सोन्याची चैन आणि रोख रक्कम मिळवण्यासाठी पुढील तपास सुरू आहे. सर्व आरोपींना अटक करून न्यायालयात हजर करण्यात आले असून, त्यांना पोलीस कोठडी सुनावण्यात आली आहे. मलकापूर पोलिसांनी नागरिकांना सावधगिरीचा सल्ला देत सोशल मीडियावरील लालसेच्या ऑफर किंवा गुंतवणुकीच्या खोट्या आश्वासनांना बळी पडू नये, कोणत्याही संशयास्पद प्रकाराची त्वरित माहिती पोलिसांना द्यावी, असे आवाहन केले आहे.
