मलकापूर ( दिपक इटनारे ): “आगीत तेल ओतण्याचे काम” नेमके कसे असते, याचा प्रत्यय सध्या बुलढाणा रोड परिसरातील नागरिकांना येत आहे. एकीकडे नाल्या गच्च भरून सांडपाणी रस्त्यावर आणि दुकानांमध्ये शिरत असताना, दुसरीकडे नगरपालिका प्रशासन मात्र “डोळे असून आंधळे” झाल्याचे चित्र पाहायला मिळत आहे. तब्बल चार ते पाच दिवसांपूर्वी नागरिकांनी तोंडी तक्रारी करूनही प्रशासनाने अद्याप कोणतीही ठोस उपाययोजना केलेली नसल्याने संतापाची लाट उसळली आहे.
शहरातील मुख्य समजल्या जाणाऱ्या बुलढाणा रोडवरील बस स्थानका समोरील नाल्या पूर्णपणे घाणीने तुंबल्या आहेत. नाल्यांमध्ये प्लास्टिक, कचरा आणि साचलेल्या चिखलामुळे सांडपाण्याचा प्रवाह थांबला असून, घाण पाणी थेट रस्त्यावर वाहत आहे. काही ठिकाणी हे पाणी दुकानांमध्ये घुसत असल्याने व्यापाऱ्यांना आर्थिक फटका बसत आहे. “वरून व्यावसायिकांचे पाणी आणि खालून गटारांचा कहर” अशी परिस्थिती परिसरात निर्माण झाली आहे. साचलेल्या सांडपाण्यामुळे परिसरात तीव्र दुर्गंधी पसरली असून डासांचे प्रमाणही प्रचंड वाढले आहे. परिणामी डेंग्यू, मलेरिया, टायफॉईडसारख्या साथीच्या आजारांचा धोका निर्माण झाला आहे. नागरिकांच्या आरोग्याशी थेट खेळ सुरू असतानाही आरोग्य विभाग मात्र “झोपेचे सोंग” घेत असल्याची चर्चा नागरिकांमध्ये सुरू आहे. स्थानिक व्यापारी आणि नागरिकांनी नगरपालिका प्रशासनाकडे वारंवार तोंडी तक्रारी करूनही अधिकाऱ्यांकडून केवळ आश्वासनांची खैरात करण्यात आली. मात्र प्रत्यक्षात “नाव मोठं आणि लक्षण खोटं” अशीच पालिकेच्या स्वच्छता मोहिमेची अवस्था असल्याचा आरोप होत आहे. काही भागांत केवळ फोटोपुरती साफसफाई करून प्रशासनाने स्वतःची पाठ थोपटून घेतली, मात्र बुलढाणा रोडवरील परिस्थिती आजही “जैसे थे” आहे. दरम्यान, या घाणीमुळे ग्राहकांनी दुकाने टाळण्यास सुरुवात केल्याने व्यापाऱ्यांच्या व्यवसायावर परिणाम होत आहे. “जखमेवर मीठ चोळण्याचे काम” म्हणजे, तक्रारी करूनही प्रशासनाकडून कोणतीही दखल घेतली जात नसल्याची भावना नागरिक व्यक्त करत आहेत. पालिका प्रशासनाच्या या निष्क्रियतेमुळे नागरिकांमध्ये प्रचंड नाराजी पसरली असून, “एखादा मोठा आजार फैलावल्यानंतरच प्रशासन जागे होणार का?” असा संतप्त सवाल आता उघडपणे विचारला जात आहे. आता तरी नगरपालिका प्रशासनाने “वेळेवर जागे होऊन” तातडीने नाल्यांची साफसफाई करून कायमस्वरूपी उपाययोजना करावी, अन्यथा नागरिकांच्या रोषाला सामोरे जावे लागेल, अशी तीव्र प्रतिक्रिया परिसरातून उमटत आहे.
