मलकापूर ( उमेश इटणारे ) :- शहरातील नव्या प्रभाग रचनेमुळे स्थानिक राजकारणात भलेमोठे चित्र बदलले असताना नागरिकांमध्ये मात्र गोंधळ, असंतोष आणि संताप यांचे वातावरण आहे. 2016 मधील 14 प्रभागांची रचना यंदाच्या निवडणुकीत 15 प्रभागांवर नेण्यात आली असून या बदलाची पद्धत व पारदर्शकता प्रश्नचिन्हाखाली येत आहे.
नव्या रचनेनुसार एकाच घरातील सदस्यांची मते तीन वेगवेगळ्या प्रभागांमध्ये कधी 13, कधी 14, तर कधी 15 मध्ये वाटल्याने नागरिकांना मतदानासाठी वेगवेगळ्या केंद्रांवर जावं लागत आहे. या व्यवस्थेने निर्माण झालेल्या मनस्तापामुळे अनेकांनी उघडपणे नाराजी व्यक्त केली असून काहींनी तर मतदान न करण्याचाच निर्धार व्यक्त केल्याचीही चर्चा रंगू लागली आहे. यामध्ये आणखी गंभीर बाब म्हणजे काही लोकप्रतिनिधींनी सत्तेचा गैरवापर करून स्वतःच्या राजकीय फायद्यासाठी प्रशासनावर प्रभाव टाकत वार्डांचे पुनर्वसन केल्याची चर्चा जोर धरत आहे. मतदारसंघाचे तुकडे करत प्रभागांचे गणित बदलण्यामागे विशिष्ट गटाला लाभ मिळावा, तर काहींना राजकीय नुकसानीत ढकलावे, अशा उद्देशानेच ही रचना करण्यात आल्याचा आरोप नागरिक अनौपचारिकरित्या करताना दिसत आहेत. या बदलामुळे निवडणुकीची संपूर्ण समीकरणेच ढवळून निघाली आहेत. उमेदवारांचे मतबँक बदलले, राजकीय गणित बिघडले, आणि सामान्य नागरिक मात्र त्रासाच्या फेऱ्यात अडकले. प्रशासनाने योग्य माहिती, मार्गदर्शन व स्पष्टीकरण न दिल्याने नागरिकांचा संताप अधिक वाढला आहे. या वातावरणाचा थेट परिणाम यंदाच्या निवडणुकीतील सहभागावर होऊ शकतो. स्थानिक पातळीवर सुरू असलेल्या चर्चांनुसार अतिशय कमी मतदानाची शक्यता व्यक्त होत आहे. नागरिकांचा प्रश्न एकच “आमचे मत कुठे? कोणत्या प्रभागात आणि कोणाच्या फायद्यासाठी आम्हाला त्रास? तर प्रभाग रचनेवरील हा वादच यंदाच्या निवडणुकीतील मुख्य मुद्दा ठरू शकतो.
