नगर परिषद मलकापूर निवडणुकीत उमेदवारीची अभूतपूर्व गर्दी; अर्ज दाखल करण्याचा शेवटचा दिवस ठरला ऐतिहासिक; नगराध्यक्ष पदासाठी 20, सदस्य पदासाठी तब्बल 359 अर्ज

मलकापूर ( उमेश इटणारे ):- नगर परिषद निवडणुकीसाठी आजचा दिवस निर्णायक ठरला. 17 नोव्हेंबर हा उमेदवारी अर्ज दाखल करण्याचा शेवटचा दिवस असल्याने सकाळपासूनच नगर परिषद कार्यालयात उमेदवार आणि कार्यकर्त्यांची प्रचंड गर्दी उसळली होती. पक्षीय तसेच अपक्ष उमेदवारांनी शेवटच्या क्षणापर्यंत धावपळ करत राजकीय वातावरण चांगलेच तापवले.
सदस्य पदासाठी आज तब्बल २२२ अर्ज दाखल झाले. कालपर्यंतच्या १३७ अर्जांसह आता एकूण संख्या ३५९ वर पोहोचली आहे. अनेक प्रभागांमध्ये उमेदवारांची मोठी रांग पाहता यंदाच्या निवडणुकीत चुरस, स्पर्धा आणि राजकीय समीकरणे निर्धारक पातळीवर जाणार असल्याचे स्पष्ट झाले आहे. नगराध्यक्ष पदासाठीही शेवटचा दिवस अत्यंत गजबजलेला ठरला. कालपर्यंत मिळालेल्या ५ अर्जांमध्ये आज १५ अर्जांची भर पडत एकूण अर्जांची संख्या २० झाली आहे. प्रमुख पक्षांच्या दावेदारांसोबतच अपक्ष उमेदवारांचीही मोठी एंट्री झाल्याने या पदासाठीची लढत अत्यंत रोचक बनली आहे. उमेदवारी अर्जांच्या अभूतपूर्व संख्येमुळे मलकापूर नगर परिषद निवडणूक यंदा अधिक चुरशीची, प्रतिष्ठेची आणि राजकीय दृष्टीने महत्त्वपूर्ण ठरणार हे निश्चित झाले आहे. आता छाननी आणि अंतिम यादीनंतर खरी लढत कोणत्या उमेदवारांमध्ये रंगणार याकडे सर्वांचे लक्ष लागले आहे.