जलंब : कोल्ह्याने दुचाकी ला धडक दिल्याने खामगाववरून दुचाकीने घराकडे परत येत असतांना दुचाकी स्वार 24 वर्षीय तरुणाचा मृत्यू झाला तर एक तरुण जखमी झाल्याची दुर्दैवी घटना १९ सप्टेंबर रोजी मध्यरात्रीच्या सुमारास जलंब-खामगाव रोडवर भोरशी नजीक घडली. या घटनेमुळे गावात व परिसरात सर्वत्र शोककळा पसरली आहे.
याबाबत वृत्त असे की माटरगाव ता. शेगाव येथील रहिवाशी आकाश अनिल मिरगे वय २४ वर्ष व त्याचा मित्र सोपान वानखडे हे दोघे जण खामगाववरून दुचाकीने घराकडे येत होते. दरम्यान त्यांच्या दुचाकीला जलंब नजीक असलेल्या भोरशी जवळ कोल्ह्याने धडक दिल्यामुळे सदर दुचाकीस्वार गंभीर जखमी झाला. त्याला उपचारासाठी खामगाव वरून अकोला येथे घेऊन जात असताना त्याचा रस्त्यामध्येच मृत्यू झाला मृतकाच्या डोक्याला गंभीर मार लागल्यामुळे त्याचा मृत्यू झाले असल्याचे समजते. तर पाठीमागे
बसलेल्या दुचाकीस्वराला सुध्दा जबर मार लागला आहे. मृतक आकाशवर दुपारी माटरगाव येथे शोकाकुल वातावरणामध्ये अंत्यसंस्कार करण्यात आले. या अचानक घडलेल्या घटनेमुळे आकाशच्या कुटुंबावर दुःखाचा डोंगर कोसळला आहे.
