लोकशाही बळकट करण्यासाठी मतदार नोंदणी करा – संतोष शिंदे, उपविभागीय अधिकारी मलकापूर यांचे आवाहन!

मलकापूर:- दिनांक :- ०६/०८/२०२४ मा. भारत निवडणूक आयोगाचे निर्देशानुसार २१-मलकापूर विधानसभा मतदारसंघामध्ये १ जुलै, २०२४ या अर्हता दिनांकावर आधारीत छायाचित्र मतदार यादीचा दुसरा विशेष संक्षिप्त पुनरिक्षण कार्यक्रम सुरु असून, सदर कार्यक्रमांतर्गत ०६ ऑगस्ट, २०२४ रोजी २१ मलकापूर विधानसभा मतदार संघातील मलकापूर व नांदुरा तालुक्यातील सर्व मतदान केंद्रावर प्रारुप मतदार यादया प्रसिध्द करण्यात आलेल्या आहेत. सदर यादया संबंधित मतदान केंद्रस्तरीय अधिकारी व संबंधित तहसील कार्यालयामध्ये पाहण्यासाठी उपलब्ध आहेत. तसेच मुख्य निवडणूक अधिकारी, महाराष्ट्र राज्य यांची वेबसाई ceo.mahararashtra.gov.in या वेबसाईटवर सुध्दा उपलब्ध आहेत. तरी २१ – मलकापूर विधानसभा मतदार संघांतील मतदारांनी आपल्या नावाची तपासणी करुन प्रारुप मतदार यादीमध्ये आपले नाव असल्याची खात्री करुन घ्यावी. सदर कार्यक्रमांतर्गत दिनांक ६ ऑगस्ट, २०२४ ते २० ऑगस्ट, २०२४ या कालावधीत दावे व हरकती स्विकारण्यात येणार आहेत. या कालावधी दरम्यान दिनांक १० ऑगस्ट, २०२४ (शनिवार) व दिनांक ११ ऑगस्ट, २०२४ (रविवार) तसेच दिनांक १७ ऑगस्ट, २०२४ (शनिवार) व १८ ऑगस्ट, २०२४ (रविवार) या दिनांकास २१ मलकापूर विधानसभा मतदार संघामध्ये मतदार नोंदणीबाबत विशेष मोहिमांचे आयोजन करण्यात आलेले आहे. या दिनांकास मतदान केंद्रस्तरीय अधिकारी (बी.एल.ओ.) हे मतदान केंद्रावर उपस्थित राहून मतदार नोंदणीचे अर्ज स्विकारणार आहेत. मतदार नोंदणीसाठी पासपोर्ट आकाराचे रंगीत छायाचित्र, आधारकार्ड, शाळा सोडल्याचे प्रमाणपत्र, रहिवासी पुरावा व आपल्या जवळच्या नातेवाईकाचे मतदार ओळखपत्राची छायांकित प्रत आवश्यक आहे. तरी २१ मलकापूर विधानसभा मतदार संघातील मलकापूर व नांदुरा तालुक्यातील दिनांक ०१/०७/२०२४ रोजी ज्यांचे वय १८ वर्षे पूर्ण झालेले आहे. अशा सर्व पात्र नागरिकांनी लोकशाही सक्षम करण्यासाठी आपल्या नावाची मतदार यादीत नोंदणी करावी. असे आवाहन श्री. संतोष शिंदे, उपविभागीय अधिकारी, मलकापूर तथा मतदार नोंदणी अधिकारी, २१-मलकापूर विधानसभा मतदार संघ तसेच आर. एम. तायडे, तहसिलदार मलकापूर व श्री. डी.एल. मुकुंदे, तहसिलदार नांदुरा यांनी केले आहे.