नूतन विद्यालयाच्या वतीने मतदान जनजागृती व पथनाट्य संपन्न

मलकापूर:- येत्या विधानसभा निवडणुकीमध्ये मतदारांमध्ये जागृती निर्माण व्हावी, सर्व कामे बाजुला सोडुन 100 टक्के मतदारांनी निवडणुकीमध्ये मतदान करावे, हा भव्य उद्देश डोळयांसमोर ठेवुन निवडणुक निर्णय अधिकारी तथा उपविभागीय अधिकारी मलकापूर संतोष शिंदे यांचे मार्गदर्शनानुसार तहसिलदार शिल्पा बोबडे, गटविकास अधिकारी उध्दव होळकर, मुख्याधिकारी आशिष बोबडे, नायब तहसिलदार श्रीकृष्ण उगले, गटशिक्षणाधिकारी एन जे फाळके यांचे मार्फत मलकापूर शहरात दि. 25 ऑक्टोबर रोजी साधारणतः 500 विद्यार्थ्यांच्या भव्य रॅलीचे आयोजन करण्यात आले. नायब तहसिलदार श्रीकृष्ण उगले यांचे शुभहस्ते रॅलीला हिरवी झेंडी दाखवुन सकाळी 8 वाजता नुतन विद्यालय मलकापुर येथुन रॅलीला प्रारंभ झाला. रॅलीचे समारोपीय भाषणात सर्व अधिकारी यांनी सर्व विद्यार्थी, शिक्षक, अधिकारी, कर्मचारी तसेच सर्व नागरीकांनी आपआपल्या घरातील सदस्य, आपले शेजारी, आप्तेष्ट यांना येत्या विधानभा निवडणुकीत 100 टक्के मतदारांनी मतदान करण्याविषयी जनजागृती करण्याचे आवाहन केले. निवडणुकांच्या वेळी कोणत्याही प्रलोभनाला किंवा दबावाला बळी न पडता आपल्या मताधिकाराचा उपयोग करावा. मतदार म्हणुन आपल्याला असलेल्या अधिकारांबाबत जागरुक राहुन देशातील लोकशाही व्यवस्था अधिक मजबुत होण्यास मदत होईल असा महत्वपूर्ण संदेश रॅलीच्या माध्यमातुन देण्यात आला. रॅलीमध्ये शहरातील नुतन विद्यालय, लि.भो. चांडक विद्यालय, गो.वि.म विद्यालय, हिराबाई संचेती कन्या शाळा या शाळेतील विद्यार्थी, शिक्षक व मुख्याध्यापक यांनी रॅलीमध्ये सहभाग घेतला. नायब तहसिलदार श्रीकृष्ण उगले, गटशिक्षणाधिकारी एन जे फाळके, शिक्षण विस्तार अधिकारी आर एम वाघमारे, नुतन विद्यालयाचे प्राचार्य अविनाश बोरले, गो.वि.विद्यालयाचे प्राचार्य जयंत कुळकर्णी, चांडक विद्यालयाचे प्राचार्य जयंत राजुरकर, हिराबाई संचेती कन्या शाळेच्या मुख्याध्यापिका सौ. ममता पांडे, तसेच महसुल, आरोग्य, शिक्षण, पोलिस विभागाचे सर्व अधिकारी व कर्मचारी यांनी रॅलीमध्ये उस्त्फुर्त सहभाग घेतला. कार्यक्रमाचे सुत्रसंचालन व आभार प्रदर्शन शिक्षण विस्तार अधिकारी आर एम वाघमारे यांनी केले. मतदार जनजागृती रॅली यशस्वी करण्यासाठी सर्व शाळांचे मुख्याध्यापक शिक्षक तसेच समग्र शिक्षा चे अतुल पाटील, नागेश बोधणे यांनी प्रयत्न केले.