मलकापूर ( उमेश इटणारे ): नगरपरिषद निवडणुकीच्या तोंडावर मलकापूरचे राजकारण अक्षरशः तापले असून छाननी प्रक्रिया व माघारीची अंतिम मुदत पार होताच निवडणुकीचे खरे चित्र स्पष्ट झाले आहे. पक्षनिष्ठा, गटबाजी, अपक्षांची ताकद आणि प्रभागनिहाय समीकरणे या सर्वांमध्ये आता खरी झुंज सुरू झाली आहे. कोणाचा प्रभाव किती आणि मतदार कोणावर विश्वास ठेवतात याची खरी परीक्षा या रिंगणात होणार आहे.
नगराध्यक्ष पदासाठी छाननीअंती 12 उमेदवार पात्र ठरले होते. मात्र धोरणात्मक चर्चेनंतर आणि दबाव-तडजोडीच्या खेळात 2 उमेदवारांनी माघार घेण्याचा निर्णय घेतला. त्यामुळे आता या प्रतिष्ठेच्या पदासाठी 10 उमेदवारांची थेट लढत रंगणार आहे. शहराच्या नेतृत्वासाठी ही निवडणूक निर्णायक ठरणार असून सर्वच प्रमुख उमेदवार आपापल्या ताकदीने प्रचारात झोकून देण्याच्या तयारीत आहेत. दरम्यान, सदस्य पदासाठी चुरस आणखी तीव्र झाली आहे. छाननीनंतर 191 उमेदवार रिंगणात होते. मात्र 60 उमेदवारांनी माघार घेतल्याने ही संख्या 131 राहिली. यातही 2 उमेदवार अविरोध निवडून आल्यामुळे आता प्रत्यक्ष 129 उमेदवार प्रभागनिहाय लढणार आहेत. प्रत्येक प्रभागात स्पर्धा तगडी असून मतदारांचा कल कोणाकडे झुकतो याकडे सर्वांचे लक्ष लागले आहे. निवडणुकीची धामधूम, उमेदवारांची प्रतिष्ठा, स्थानिक गटबाजी, विकासाचा मुद्दा आणि बदलाची अपेक्षा या सर्वांमुळे या निवडणुकीत मलकापूरची राजकीय हवा अधिकच तापण्याची चिन्हे आहेत. आता रिंगण निश्चित झाल्याने खरी रणधुमाळी सुरू झाली असून मतदारांपर्यंत पोहोचण्यासाठी सर्व पक्षांनी कंबर कसली आहे.
