मलकापूर:- नगरपरिषद निवडणुकीत स्थानिक पातळीवर नवीन चेहरे आणि तरुण नेतृत्व पुढे येत असताना प्रभाग क्रमांक १२ मधून पत्रकार स्वप्निल आकोटकर यांनी अपक्ष उमेदवारी अर्ज दाखल करून राजकीय क्षेत्रात जोरदार एन्ट्री केली आहे. दीर्घकाळ पत्रकारितेत कार्यरत राहून सामान्य नागरिकांच्या प्रश्नांना न्याय मिळवून देण्यासाठी त्यांनी सातत्याने आवाज उठवला. सामाजिक भान आणि जनतेच्या वेदना जवळून अनुभवल्यानंतर आता लोकप्रतिनिधी म्हणून थेट सेवेसाठी राजकीय प्रवास सुरू करण्याचा त्यांनी निर्णय घेतला आहे.
स्वप्निल आकोटकर यांनी प्रभाग क्रमांक १२ मधून अपक्ष उमेदवार म्हणून अर्ज दाखल करताच स्थानिक नागरिकांमध्ये चर्चा सुरू झाली आहे. कोणत्याही पक्षाचा आधार न घेता निवडणूक लढवण्याचा निर्णय त्यांनी घेतल्याने ते स्वतंत्र आणि पारदर्शक कारभारावर भर देऊ इच्छित असल्याचे मानले जात आहे. पत्रकार म्हणून काम करताना प्रशासनातील त्रुटी, जनतेच्या समस्या आणि स्थानिक प्रश्न यावर त्यांनी प्रभावीपणे प्रकाश टाकला. त्यामुळे त्यांना मिळणारा लोकांचा प्रतिसाद काय असेल, याकडे सर्वांचे लक्ष लागले आहे. पक्षीय राजकारणापेक्षा विकासाला प्राधान्य देत स्वतःचा स्वतंत्र मार्ग निवडण्याची त्यांची घोषणा राजकीय वातावरणात नवीन ऊर्जा निर्माण करणारी ठरत आहे. आगामी निवडणुकीत प्रभाग क्रमांक १२ मध्ये स्वप्निल आकोटकर मतदारांसाठी किती प्रभाव टाकतात, हे पाहणे उत्सुकतेचे ठरणार आहे.
