मलकापूर :- ( उमेश ईटणारे ) स्वच्छ भारत अभियानाचा गाजावाजा करीत असतानाच माता महाकाली नगरातील सार्वजनिक शौचालयांची अवस्था मात्र अत्यंत दयनीय झाली आहे. परिसरात उभारलेली २० सार्वजनिक शौचालये दहा पुरुषांसाठी, आणि दहा महिलांसाठी, गेल्या अनेक महिन्यांपासून साफसफाईअभावी अक्षरशः कचऱ्याचे ढिगारे बनली आहेत. शौचालयात असह्य दुर्गंधी, तुटलेले दरवाजे, भरलेली घाण आणि स्वच्छतेसाठी एकही कर्मचारी न येणे, या सर्व प्रकारांमुळे नागरिक त्रस्त झाले आहेत. शौचालयांची साफसफाई पूर्णपणे बंद असल्याने आतमध्ये थरावर थर घाण जमा झाली आहे. अनेक शौचालयांचे दरवाजे तुटले असून, महिलांना व ज्येष्ठ नागरिकांना मोठ्या अडचणींचा सामना करावा लागत आहे. असह्य दुर्गंधीमुळे परिसरातील नागरिकांना शौचालयाचा वापर करणे अशक्य झाल्याने त्यांना उघड्यावर जाण्याची वेळ येत आहे. परिणामी स्वच्छ भारत अभियानाचे उद्दिष्टच धुळीस मिळत असल्याची भावना नागरिकांत आहे.
लोकप्रतिनिधी आणि पालिका प्रशासनाचे पूर्ण दुर्लक्ष
शौचालयांच्या या बिकट अवस्थेबाबत नागरिकांनी वारंवार तक्रारी केल्या तरीही ना संबंधित कर्मचारी दिसतो ना अधिकारी. लोकप्रतिनिधीही या गंभीर समस्येकडे पूर्णतः दुर्लक्ष करत असल्याचा आरोप नागरिक करत आहेत. प्रशासन फक्त दाव्यांपुरते स्वच्छतेचे भाषण करत असल्याचे नागरिकांचे म्हणणे आहे. नागरिकांनी पालिका प्रशासनाला शौचालयांची तात्काळ संपूर्ण साफसफाई करून दरवाजे दुरुस्त करण्याची मागणी केली आहे. सार्वजनिक सुविधा अशा प्रकारे मोडकळीस आल्याने स्वच्छता अभियानाची प्रतिमा मलिन होत असून, प्रशासनाच्या बेफिकीरीमुळे नागरिक त्रस्त झाले आहेत.
