मलकापूर :- ( उमेश ईटणारे ) शहरातील सहा दिवसांपासून ठप्प पडलेली कचरा गाडी सेवा अखेर आज पुन्हा सुरू झाली आहे. विदर्भ लाईव्हने काल प्रसिद्ध केलेल्या बातमीची प्रशासनाने तात्काळ दखल घेत या गंभीर प्रश्नावर कारवाई केली असून शहरवासीयांना मोठा दिलासा मिळाला आहे. गेल्या काही दिवसांपासून शहरात सर्वत्र कचऱ्याचे ढीग, दुर्गंधी आणि डासांचा प्रादुर्भाव वाढल्यामुळे नागरिकांमध्ये तीव्र नाराजी निर्माण झाली होती. मजुरांचे थकलेले वेतन आणि संपामुळे कचरा व्यवस्थापन पूर्णपणे बंद झाले होते. ही समस्या दुर्लक्षित राहत असतानाच विदर्भ लाईव्हने परिस्थितीची वस्तुस्थिती ठळकपणे मांडत नगरपरिषद प्रशासनाचे लक्ष वेधले. याचा तात्काळ परिणाम प्रशासनावर झाला आणि आज सकाळपासून कचरा गाडी पुन्हा रस्त्यावर धावताना दिसली. अनेक भागांतील कचरा उचलण्याचे काम सुरू झाल्याने नागरिकांनी समाधान व्यक्त केले. विदर्भ लाईव्हने आवाज उठवला नसता तर कदाचित अजून काही दिवस कचरा तसाच राहिला असता. तुमच्या बातमीमुळेच प्रशासन हलले असे मत सोशल मीडियावर अनेकांनी व्यक्त केले आहे. कचरा व्यवस्थापन सुरळीत सुरू ठेवण्यासाठी मजुरांचे वेतन प्रकरण तत्काळ सोडवण्याची प्रक्रिया सुरू असल्याचे सूत्रांनी सांगितले आहे. मलकापूर शहरातील समस्या मांडून त्यावर तातडीचा इम्पॅक्ट निर्माण केल्याबद्दल विदर्भ लाईव्हचे नागरिकांकडून कौतुक होत आहे. शहरातील परिस्थिती सुधारण्यासाठी पुढेही अशाच प्रकारे जनतेचा आवाज पोहोचवत राहू, असे विदर्भ लाईव्हने सांगितले आहे.
