खामगाव : देशी आणि विदेशी दारूची अवैध वाहतूक करून विक्री करण्यासाठी जात असलेल्या आरोपीला खामगाव ग्रामीण पोलिसांनी ताब्यात घेतले. शनिवारी रात्री दहा वाजता पारखेड फाटा येथे ही कारवाई करण्यात आली.
पोलिसांना मिळालेल्या गुप्त माहितीनुसार, जलंब येथील प्रवीण हरीचंद्र रोठे (वय २२) याच्यावर छापा टाकण्यात आला. यावेळी त्याच्याकडे देशी दारूच्या ३०० बाटल्या, विदेशी दारू व बियरच्या ६९ बाटल्या असा एकूण २४,३२० रुपये किमतीचा माल सापडला. तसेच आरोपीकडे ३०,००० रुपये किमतीची दुचाकीही जप्त करण्यात आली. खामगाव ग्रामीण पोलिसांनी एकूण ५४,००० रुपयांचा मुद्देमाल ताब्यात घेतला असून आरोपीविरुद्ध गुन्हा दाखल करण्यात आला आहे.
