मलकापूर( दिपक इटणारे ): मलकापूर नगरपरिषदेचे माजी नगराध्यक्ष आणि भारतीय राष्ट्रीय काँग्रेस पक्षाचे निष्ठावान कार्यकर्ते नारायणदास निहलानी यांनी पक्षाच्या प्राथमिक सदस्यत्वाचा राजीनामा देत सक्रिय राजकारणातून निवृत्तीची घोषणा केली आहे. गेल्या तीन दशकांहून अधिक काळ त्यांनी शहराच्या विकासासाठी आणि जनतेच्या हितासाठी झोकून दिलेले कार्य आजही सर्वांच्या स्मरणात आहे.
३२ वर्षांचे समर्पित कार्य
भारतीय राष्ट्रीय काँग्रेस पक्षाशी इमानेइतबारे जोडले गेलेले निहलानी यांनी पक्षाच्या ध्येयधोरणांना अखेरपर्यंत प्राधान्य दिले. नगराध्यक्षपदाच्या कार्यकाळात त्यांनी शहराच्या विकासासाठी अतुलनीय योगदान दिले. जात, धर्म किंवा पक्षभेद न करता त्यांनी मलकापूरचे रूप बदलण्यासाठी धडपड केली. त्यांच्या काळातील विकासकामांचा ठसा आजही शहरावर आहे.
तब्येतीच्या कारणास्तव राजीनामा
मागील काही काळात तब्येतीच्या अडचणींनी त्रस्त असलेल्या निहलानी यांनी मोठी शस्त्रक्रिया घेतली. आता प्रकृती स्थिर असली तरी वैयक्तिक कारणास्तव पक्ष आणि राजकारणासाठी वेळ देणे शक्य नाही, यामुळे त्यांनी हा निर्णय घेतला. “भविष्यात माझ्या वैयक्तिक अडचणींमुळे पक्षासाठी काम करणे कठीण आहे,” असे त्यांनी स्पष्ट केले.
जनतेबद्दल विशेष कृतज्ञता
निवृत्तीची घोषणा करताना निहलानी यांनी मलकापूरवासीयांबद्दल आपली कृतज्ञता व्यक्त केली. “माझ्या आयुष्यात मला सर्व जाती-धर्मांच्या लोकांचे अपार प्रेम लाभले. या प्रेमाचे ऋण मी आयुष्यभर विसरणार नाही. येणाऱ्या काळातही हे प्रेम कायम राहील, अशी अपेक्षा आहे,” असे भावनिक उद्गार त्यांनी काढले.
मलकापूरच्या राजकारणात मोठी पोकळी
नारायणदास निहलानी यांच्या निर्णयामुळे मलकापूरच्या राजकीय वर्तुळात मोठी पोकळी निर्माण झाली आहे. पक्षासाठी निष्ठेने काम करणाऱ्या नेत्याने घेतलेली निवृत्ती सर्वांसाठी अनपेक्षित ठरली. त्यांच्या निस्वार्थी कार्याचा वारसा पुढे नेण्याचे आव्हान आता पक्षासमोर आहे.
“माझे आयुष्य पक्ष आणि जनतेसाठी समर्पित”
“भारतीय राष्ट्रीय काँग्रेसने मला संधी दिली, जबाबदारी दिली आणि जनतेच्या सेवेसाठी काम करण्याचा मंच दिला. मी पक्षाचा आणि जनतेचा सदैव ऋणी राहीन,” अशा शब्दांत त्यांनी आपल्या भावनांना वाट मोकळी करून दिली.
निहलानी यांच्या निवृत्तीमुळे मलकापूरच्या जनतेने एक प्रामाणिक, विकासाभिमुख आणि संवेदनशील नेता गमावला आहे. त्यांच्या कार्याचा आदर्श आजही नवीन पिढीला प्रेरणा देतो.
