मलकापूर :- स्वराज्य संस्थांच्या निवडणुकांची घोषणा होताच मलकापूर शहरात राजकीय घडामोडींना वेग आला आहे. सर्वच पक्षांनी तयारीला जोर दिला असून प्रभाग क्रमांक 15 मध्येही नवीन समीकरणे तयार होत आहेत. याच पार्श्वभूमीवर पत्रकार दीपक गणेश ईटणारे यांनी आज प्रभाग क्र. 15 मधून अपक्ष उमेदवार म्हणून आपला उमेदवारी अर्ज दाखल केला. दीपक ईटणारे हे गेल्या अनेक वर्षांपासून पत्रकारितेत कार्यरत असून, सर्वसामान्यांच्या समस्या, स्थानिक प्रश्न आणि नागरिकांच्या हक्कांसाठी त्यांनी निर्भीडपणे आवाज उठवला आहे. समाजातील प्रत्येक घटकासाठी लेखणीने लढा देत, त्यांनी स्वतःची विश्वासार्ह ओळख निर्माण केली आहे. आता प्रभागात आवश्यक असलेला विकास, मूलभूत सुविधा, स्वच्छता, पाणीपुरवठा आणि रस्त्यांवरील प्रलंबित कामे यासाठी थेट लोकप्रतिनिधी म्हणून काम करण्याचा निर्णय त्यांनी घेतला आहे. पत्रकारितेतून समाजसेवा केल्यानंतर, आता राजकारणातूनही नागरिकांच्या प्रश्नांवर ठोस काम करणार असल्याचे त्यांनी सांगितले. उमेदवारी अर्ज दाखल केल्यानंतर ईटणारे यांनी सांगितले मी आजवर सर्वसामान्यांसाठी लेखणीने लढलो… आता प्रत्यक्ष लोकसेवा करण्यासाठी पुढे आलो आहे. प्रभागाचा विकास हा माझा एकमेव उद्देश आहे. निवडणूक लढू आणि जिंकू सुद्धा, असा पूर्ण आत्मविश्वास आहे. प्रभाग क्रमांक 15 मध्ये यावर्षी युवकांचा सहभाग वाढत असून, ईटणारे यांच्या अपक्ष उमेदवारीमुळे या प्रभागातील निवडणूक अधिक चुरशीची होण्याची चिन्हे दिसू लागली आहेत.
