मलकापूर : नगरपालिका निवडणुकीचा निकाल जाहीर होताच मलकापूरच्या राजकीय वर्तुळात मोठी खळबळ उडाली आहे. या निवडणुकीत राष्ट्रवादी काँग्रेस (अजित पवार गट) ने प्रथमच इतिहास घडवत १७ पैकी तब्बल चार जागांवर विजय मिळवला आहे. विशेष म्हणजे मलकापूर नगरपालिकेच्या आजवरच्या इतिहासात राष्ट्रवादी पक्षाला इतक्या जागा कधीही मिळालेल्या नव्हत्या. या ऐतिहासिक यशामुळे राष्ट्रवादी अजित पवार गटाचे नेतृत्व करणारे प्रसाद जाधव हे शहराच्या राजकारणात केंद्रस्थानी आले आहेत. या निवडणुकीत युवा आणि दमदार नेतृत्वाची छाप उमटवत प्रसाद जाधव यांनी संपूर्ण ताकदीने निवडणूक रिंगणात उतरून जनतेशी थेट संवाद साधला. विकास, पारदर्शकता आणि नव्या नेतृत्वाचा विश्वास या मुद्द्यांवर त्यांनी प्रचार केला. त्याचा थेट फायदा पक्षाला होताना दिसून आला आणि जनतेने त्यांच्या नेतृत्वावर विश्वास दाखवत राष्ट्रवादीला चार जागा बहाल केल्या. आजपर्यंत मलकापूर शहरात राष्ट्रवादी काँग्रेसला मर्यादित यश मिळत आले होते. मात्र यावेळी परिस्थिती बदलली असून, प्रसाद जाधव यांच्या नेतृत्वाखाली राष्ट्रवादीने आपली ताकद सिद्ध केली आहे. ही केवळ चार जागांची आकडेवारी नसून, शहरातील बदलत्या राजकीय प्रवाहाचे आणि जनतेच्या अपेक्षांचे प्रतिबिंब असल्याचे बोलले जात आहे. विशेष म्हणजे, राष्ट्रवादी अजित पवार गटाने ही निवडणूक अत्यंत नियोजनबद्ध पद्धतीने लढवली. प्रत्येक प्रभागात स्थानिक प्रश्न, नागरी सुविधा, युवकांचे प्रश्न आणि भविष्यातील विकासाचा आराखडा जनतेसमोर मांडण्यात आला. त्यामुळे मतदारांनी पारंपरिक राजकारणापेक्षा नव्या विचारांना संधी दिल्याचे या निकालातून स्पष्ट होते. या निकालानंतर मलकापूरच्या राजकारणात राष्ट्रवादी अजित पवार गटाचे वजन लक्षणीयरीत्या वाढले असून, आगामी काळात नगरपालिकेच्या राजकारणात त्यांची भूमिका अधिक निर्णायक ठरण्याची शक्यता वर्तवली जात आहे. एकूणच, प्रसाद जाधव यांच्या नेतृत्वावर जनतेने शिक्कामोर्तब करत मलकापूरच्या राजकीय इतिहासात नवा अध्याय लिहिला आहे.
