मलकापूर: स्थानिक मलकापूर शहरातील धार्मिक आणि सामाजिक वातावरण अधिक समृद्ध करण्याच्या उद्देशाने श्री सदविचार सेवा समिती, मलकापूर यांच्या वतीने त्यांच्या स्थापनाच्या रजत महोत्सवानिमित्त भव्य आणि दिव्य अशा श्री शिव पुराण कथा महोत्सवाचे आयोजन करण्यात आले आहे. सात दिवस चालणाऱ्या या धार्मिक सोहळ्यामुळे संपूर्ण शहर भक्तीमय वातावरणात रंगून जाणार आहे. १३ फेब्रुवारी ते १९ फेब्रुवारी २०२५ या कालावधीत श्री शिवधाम, कृष्णा विहार, रजत नगर समोर, बिर्ला रोड, मलकापूर येथे या कथामहोत्सवाचे आयोजन करण्यात आले असून, सुप्रसिद्ध कथा प्रवचनकार उज्जैन येथील पंडित विजयशंकरजी मेहता यांच्या मधुर वाणीतून भक्तांना शिवमहिम्याचे श्रवण करण्याची संधी मिळणार आहे. कथा दुपारी १.३० ते ५.०० या वेळेत होणार असून, श्रद्धाळू भक्तांनी मोठ्या संख्येने उपस्थित राहावे, असे आवाहन समितीच्या वतीने करण्यात आले आहे.
धर्म व अध्यात्म यांची समृद्ध परंपरा आपल्या देशात खोलवर रुजलेली आहे. या आध्यात्मिक मार्गावर भक्तांना नवी दिशा मिळावी म्हणून पं. विजयशंकर मेहता गेली अनेक दशके कार्यरत आहेत. केवळ भारतातच नव्हे, तर संपूर्ण जगभर त्यांचे प्रवचन कार्यक्रम होत असतात. ते गोल्डन बुक ऑफ वर्ल्ड रेकॉर्डमध्ये नोंद असलेले एकमेव प्रवचनकार आहेत. त्यांच्या कथा केवळ धर्मापुरत्या मर्यादित नसून, त्या जीवन व्यवस्थापनाचा मंत्र देणाऱ्या असतात. २००८ साली त्यांनी दैनिक भास्करमध्ये ‘संक्रमण से जीवन प्रबंधन’ या विषयावर लेखन सुरू केले, ज्याला प्रचंड प्रतिसाद मिळाला.
विशेष म्हणजे, पंडित विजयशंकर मेहता यांनी पाकिस्तानसारख्या कट्टर मुस्लिम देशात देखील प्रवचन केले आहे. पाकिस्तानमध्ये राहून भगवद्गीता आणि शिवपुराणावर प्रवचने देणे ही मोठीच बाब आहे. कट्टरतावादी वातावरण असलेल्या देशात हिंदू धर्माचा प्रचार करणे सोपे नाही, मात्र त्यांच्या आध्यात्मिक विचारांनी तेथील जनतेवरही प्रभाव टाकला. त्यांना केवळ भारतातच नव्हे, तर संपूर्ण जगभर मान्यता मिळाली आहे. त्यांच्या या अद्वितीय कार्यामुळेच ते जगभरात प्रेरणादायी वक्ते म्हणून ओळखले जातात.
पंडित विजयशंकर मेहता आणि मलकापूर यांचे एक विशेष नाते आहे. २०१५ मध्ये ‘हमारे हनुमान’ चरित्रावर आधारित सात दिवसीय कथा श्री सदविचार सेवा समितीच्या वतीने मलकापूर येथे आयोजित करण्यात आली होती. या कथेमध्येही पं. विजयशंकर मेहता यांचीच अमृतमय वाणी भक्तांनी अनुभवली होती. त्यांच्या प्रवचनातील ओजस्वीता, गोडवा आणि त्यांचे उत्तम कथनकौशल्य पाहता, मलकापूरमधील भक्तगणांनी पुन्हा त्यांना आमंत्रित करण्याचा आग्रह धरला. त्यांच्या वाणीतच असलेली अध्यात्माची शक्ति आणि प्रबोधनपर संदेश पाहता, या वर्षीही त्यांना पुन्हा बोलविण्यात आले आहे.
त्यांनी आतापर्यंत विविध ठिकाणी ६००० हून अधिक कथांचे आयोजन केले असून, त्यांच्या कथा १०० पेक्षा अधिक ठिकाणी प्रसिद्ध झाल्या आहेत. २०१८ मध्ये त्यांनी ३६५ दिवसांत २५६ प्रवचने देण्याचा विक्रम केला आहे. विशेष म्हणजे, कोरोना काळात त्यांनी ऑनलाईन माध्यमातून ७३ कथा सादर केल्या, ज्या संपूर्ण जगभरातील भक्तांनी अनुभवल्या. २०२४ सालच्या अखेरीस त्यांनी भगवद्गीता आणि शिवपुराण यांचे विशेष प्रवचन २४ वेळा केले आहे. त्यांची कथा केवळ भक्तिभाव निर्माण करत नाही, तर संस्कार, आत्मबळ आणि जीवन व्यवस्थापनाचे धडेही देते.
या भव्य कार्यक्रमाची सुरुवात १३ फेब्रुवारी रोजी सकाळी ८.०० वाजता भव्य शोभायात्रेने होणार आहे. ही शोभायात्रा श्री भातृमंडळ, चाळीस बिघा येथून सुरू होऊन डॉ. पाचपांडे मार्ग, कॉटेज हॉस्पिटल रोड, बुलडाणा रोड, हनुमान टॉकीज चौक, बिर्ला रोड मार्गे कृष्णा विहार येथील कथा स्थळी पोहोचणार आहे. या शोभायात्रेत शहरातील विविध धार्मिक संस्था, मंडळे, तसेच काकड आरती मंडळ सहभागी होऊन मलकापूरच्या आध्यात्मिक वातावरणात भर टाकणार आहेत. शोभायात्रेच्या मार्गावर भगव्या ध्वजांनी सजवलेल्या रांगोळ्या, ढोल-ताशांचा गजर, आकर्षक देखावे आणि भक्तीमय गीते यामुळे संपूर्ण शहर शिवमय होणार आहे.
यात्रेतील महिला भगिनींसाठी विशेष कलश यात्रा आयोजित करण्यात आली आहे. या यात्रेत सहभागी होऊ इच्छिणाऱ्या महिलांनी सकाळी ७.३० वाजेपर्यंत लाल किंवा पिवळ्या साडीत उपस्थित राहावे. कलश सोबत आणण्याची आवश्यकता नाही, कारण श्रीफल, फुले व पत्री यांची संपूर्ण व्यवस्था समितीच्या वतीने करण्यात आली आहे. त्यामुळे जास्तीत जास्त महिला भक्तांनी या पवित्र यात्रेत सहभागी व्हावे, असे आवाहन करण्यात आले आहे.
कथा कालावधीत दररोज सकाळी यज्ञ व सव्वा लाख पार्थिव शिवलिंगांचे पूजन आयोजित करण्यात आले आहे. हे शिवलिंग भक्तांच्या श्रद्धेने आणि भक्तीने तयार करून पूजनासाठी सादर केले जातील. इच्छुक भाविकांनी पार्थिव शिवलिंग तयार करून ते १० फेब्रुवारीपर्यंत ओंकार कलेक्शन येथे जमा करावेत, असे समितीच्या वतीने आवाहन करण्यात आले आहे. याशिवाय, या पवित्र आणि पुण्यप्रद धार्मिक कार्यात आर्थिक योगदान देऊ इच्छिणाऱ्या श्रद्धाळूंनी ICICI बँक, CMS मुंबई शाखेच्या MUSM22002000018 या खाते क्रमांकावर आपले दान जमा करावे. IFSC कोड ICIC0000104 आहे.
मलकापूर शहरातील सर्व भाविकांनी या पवित्र कार्यात सहभागी होऊन शिव महिम्याचा लाभ घ्यावा, भक्तिरसात न्हाऊन जावे आणि पुण्यलाभ मिळवावा, असे आवाहन श्री सदविचार सेवा समिती, मलकापूर यांच्या वतीने करण्यात आले आहे. या आयोजनामुळे मलकापूर शहरात शिवभक्तीचा महासागर लहरणार आहे, असा विश्वास समितीच्या पदाधिकाऱ्यांनी व्यक्त केला आहे.
