मूर्तिजापूर : तालुक्यातील माना पोलिस स्टेशनअंतर्गत असलेल्या एका गावातील ६ वर्षीय चिमुकलीवर २० वर्षीय युवकाने लैंगिक अत्याचार केल्याची घटना २३ मे रोजी रात्री ९ वाजताच्या सुमारास घडली. या प्रकरणी चिमुकलीच्या आईवडिलांनी माना पोलिस स्टेशनला दिलेल्या तक्रारीवरून पोलिसांनी गुन्हा दाखल केला. या घटनेमुळे सर्वच स्तरातून संताप व्यक्त होत आहे. सहा वर्षीय चिमुकली ही २३ मे रोजी रात्री ९ वाजताच्या सुमारास गावातील युवकाच्या राहत्या घरी टीव्ही पाहावयास गेली होती. त्यावेळेस या वासनांध युवकाने चिमुरडीवर लैंगिक अत्याचार केला. घडलेला हा प्रकार चिमुकलीने घरी गेल्यावर तिच्या आईवडिलांना सांगितला. तिच्या सांगण्यावरून आईवडिलांनी तातडीने माना पोलिस स्टेशन गाठून फिर्याद दिली. यावरून माना पोलिसांनी कलम ३७६ पोस्कोअंतर्गत ३ व ४ नुसार गुन्हा नोंदविला. या युवकास पोलिसांनी अटक केली असून, त्याला तीन दिवसांची पोलिस कोठडी ठोठावण्यात आली आहे. तपास माना पोलिस स्टेशनचे पोलिस निरीक्षक सूरज सुरोशे करीत आहेत.
टीव्ही पाहण्यासाठी गेलेल्या सहा वर्षीय चिमुकलीवर अत्याचार; आरोपीला अटक
