दोन दुचाकींचा भीषण अपघात, एक ठार, दोन जखमी ; मलकापूर शहरातील घटना!

मलकापूर (प्रतिनिधी):
आज ७ नोव्हेंबर रोजी दुपारी बोदवड रोडवरील बीएसएनएल टॉवरजवळ घडलेल्या दुचाकी अपघातात एक व्यक्ती ठार झाली, तर एक जण गंभीर तर एक किरकोळ जखमी झाला. जांबुळधाबाकडून मलकापूरकडे येणाऱ्या अज्ञात दुचाकीस्वाराने एका दुसऱ्या दुचाकीला धडक दिली. मिळालेली माहिती अशी की, बोदवड रोडवरील बीएसएनएल टॉवरजवळ महाराष्ट्र वेल्डिंग शेतामध्ये काम करणारे मजूर दुपारी १ वाजेच्या सुमारास घराकडे निघाले होते. शेतातून मुख्य रस्त्यावर चढत असताना त्यांना जांबुळधाबा कडून मलकापूरकडे येणाऱ्या दुचाकीने जोरदार धडक दिली. या अपघातात दुर्गानगर येथील शिवाजी गणपत पाटील (५६) यांचा जागीच मृत्यू झाला, तर त्यांच्या दुचाकीवरील सुनिल प्रकाश पाटील (३५) हे गंभीर जखमी झाले आणि बापु केशव पाटील (३०) हे किरकोळ जखमी झाले.या प्रकरणी मलकापूर शहर पोलिस ठाण्यात फिर्याद दाखल करण्यात आली आहे. पोलिस अधिक तपास करीत आहेत.