मलकापूर / धुपेश्वर :- धुपेश्वर येथे किरकोळ वादातून धारदार हत्याराने तरुणाचा खून व एक जण गंभीर जखमी झाल्याच्या प्रकरणातील चार आरोपींना आज न्यायालयासमोर हजर करण्यात आले. न्यायालयाने त्यांना चार दिवसांची पोलीस कोठडी सुनावली आहे. ही घटना मंगळवार, दिनांक ८ ऑक्टोबर २०२५ रोजी सायंकाळी साडेपाचच्या सुमारास धुपेश्वर मंदिराजवळ घडली होती. या प्रकरणी एमआयडीसी पोलीस ठाण्यात फिर्यादी सुरज सुनिल झाल्टे (वय २१ वर्षे, रा. चित्राळा, ता. मुक्ताईनगर, जि. भुसावळ) यांच्या तक्रारीवरून नऊ आरोपींविरुद्ध कलम १०३(१), १०९, ११८(१), १८९(२)(४), १९०, १९१(१)(३) बीएनएस नुसार गुन्हा नोंदविण्यात आला आहे. फिर्यादीच्या माहितीनुसार, मृत अविनाश जितेंद्र झाल्टे याचा झोडगा गावाजवळ काही युवकांशी दुचाकीच्या कटच्या कारणावरून वाद झाला होता. त्यानंतर हेच युवक धुपेश्वर पुलाजवळ येऊन अविनाशवर पुन्हा हल्ला करत धारदार हत्याराने वार केले. त्यावेळी सतीश गजानन झाल्टे (रा. पिंप्राळा) हा मध्ये पडून आवरण्याचा प्रयत्न करत असताना संकेत सुनील उन्हाळे याने त्याच्यावर चाकूने पोटावर, हातावर व डोक्यावर वार केले. उपचारासाठी नेत असताना सतीशचा मृत्यू झाला. दरम्यान, फिर्यादी सुरज झाल्टे यांनी हल्ला रोखण्याचा प्रयत्न करताना डाव्या हातावर वार झाल्याने ते जखमी झाले. घटनेनंतर आरोपी पळून गेले, मात्र गावकऱ्यांच्या मदतीने साहिल पालवे, देवसिंग ठाकुर, संकेत उन्हाळे व अरविंद उर्फ गबऱ्या सोळंके या चार आरोपींना पकडून पोलिसांच्या ताब्यात देण्यात आले. उर्वरित आरोपी आदित्य वानखेडे, रुशी इंगळे, हर्षल घोंगटे, गणेश वायडे व कौशल घाटे हे अद्याप फरार असून पोलिस त्यांचा शोध घेत आहेत. ही घटना अमली पदार्थांच्या नशेतून घडल्याचा संशय व्यक्त केला असून, पुढील तपास सपोनी हेमराज कोळी यांच्या मार्गदर्शनाखाली सुरू आहे. चारही अटक आरोपींना न्यायालयाने चार दिवसांची पोलीस कोठडी सुनावली आहे.
