मलकापूर:- ( उमेश इटणारे ) विधानसभा मतदारसंघातील राजकीय समीकरणं या निवडणुकीत चर्चेचा विषय ठरले आहेत. काँग्रेसने विद्यमान आमदार राजेश एकडे यांना पुन्हा उमेदवारी दिल्याने माजी नगराध्यक्ष एडवोकेट हरीश रावळ यांनी या निर्णयाविरुद्ध बंडखोरीचा निर्णय घेत, अपक्ष लढण्याची तयारी दर्शवली. काँग्रेस पक्षात तिकीटाबद्दल सुरुवातीपासूनच चर्चा असतानाच, हरीश रावळ यांचं नाव उमेदवारीसाठी प्रखरपणे चर्चेत होतं. तथापि, २०१९ मध्ये भाजपमधून आलेल्या राजेश एकडे यांना काँग्रेसने उमेदवारी दिल्याने हरीश रावळ नाराज झाले, परंतु त्यांनी माध्यमांसमोर तीव्र नाराजी व्यक्त केली नाही.
यावेळी, राजेश एकडे यांच्याविरुद्ध आरोप-प्रत्यारोपांचे फटाके उडत होते. रावळ यांनी आमदार एकडे यांच्यावर विकास कामांमध्ये दुर्लक्षाचा आरोप करताना, भूमिपूजन झालेल्या कामांचा निधीच अद्याप आला नसल्याचं सांगितलं. दुसरीकडे, एकडे यांनी रावळ यांना “भाजपची बी टीम” म्हणत काँग्रेसच्या अधिकृत उमेदवाराच्या विरोधात काम करण्याचा आरोप लावला. हे आरोप-प्रत्यारोप मतदारांच्या मनावर प्रभाव टाकत असताना, निवडणुकीत रावळ यांनी अपक्ष लढण्याचा निर्णय घेतल्याने त्यांचे कार्यकर्ते उत्साहित झाले. मात्र, 4 ऑक्टोबर रोजी नामांकन मागे घेण्याच्या अंतिम दिवशी हरीश रावळ यांनी आपला अर्ज मागे घेतला. ह्या निर्णायामागे कोणत्या कारणांची पूर्तता झाली हे अजूनही स्पष्ट झालं नाही. कार्यकर्त्यांच्या मनात रावळ यांच्या मागे हटण्याने काही प्रमाणात निराशा निर्माण झाली असली तरी, ह्या राजकीय निर्णयाचा परिणाम मलकापूरच्या निवडणुकीवर नक्कीच दिसून येईल. काँग्रेसच्या अंतर्गत परिस्थितीवर परिणाम करणाऱ्या या घटनाक्रमाने पक्षात स्थिरता आणण्यासाठी प्रयत्न झाले असले तरी, उमेदवारी देण्याच्या प्रक्रियेवरून ताण-तणाव वाढल्याचे दिसून येत आहे.
