मलकापूर ( विदर्भ लाईव्ह वृत्तसेवा ) :- नगरपरिषद निवडणुकीत प्रभाग क्रमांक १५-ब मध्ये यंदा प्रचंड चुरस निर्माण झाली असून काँग्रेस-भाजपाच्या परंपरागत लढतीला यंदा एक मजबूत अपक्ष उमेदवाराचे आव्हान सामोरे येत आहे. या प्रभागात काँग्रेसचे हरीश रावळ, भाजपचे साहेबराव खराटे आणि अपक्ष उमेदवार पत्रकार दिपक गणेश इटणारे यांच्या तिरंगी लढतीने वातावरण तापले आहे. मात्र या तिघांमध्ये सर्वाधिक चर्चा एकाच नावाची दिपक इटणारे यांच्या उदयाची. पत्रकार म्हणून नागरिकांच्या समस्या, प्रभागातील अन्याय, सरकारी यंत्रणेतील त्रुटी आणि सामान्यांच्या अडचणी सतत मांडत आलेले दिपक इटणारे यांचे जनसंपर्क जाळे आणि विश्वासार्ह प्रतिमा ही यंदाच्या निवडणुकीतील सर्वात प्रभावी बाजू ठरत आहे. मोठ्या पक्षांच्या उमेदवारांपेक्षा स्थानिक पातळीवर दृश्यमान काम, तळागाळातला संपर्क आणि ‘आपला माणूस’ अशी प्रतिमा यामुळे त्यांची उमेदवारी चर्चेत आली असून काँग्रेस व भाजप दोन्ही पक्षांसाठी ते “डोकेदुखी” ठरू लागले आहेत. काँग्रेसचे हरीश रावळ यांच्यासाठी ही निवडणूक अस्तित्व टिकवण्याची म्हणून पाहिली जात आहे. परंपरागत मतदार टिकवणे आणि नव्या पिढीला आपल्याकडे खेचणे, या दुहेरी आव्हानांशी त्यांना दोनहात करावे लागत आहे. प्रभागात अनेक वर्षांपासून असलेला त्यांचा पक्षीय प्रभाव काही प्रमाणात टिकून असला तरी, जनतेत निर्माण झालेला असंतोष व बदलाची मागणी हा त्यांच्यासाठी मोठा धोका मानला जातो. भाजपचे साहेबराव खराटे हे प्रभागात “नवीन चेहरा” म्हणून उदयास आले आहेत. पक्षाच्या संघटनात्मक पाठबळावर ते मैदानात उतरले असले तरी त्यांना जनतेतील प्रत्यक्ष स्वीकार मिळवावा लागणार आहे. भाजपची संघटना मजबूत असली, तरी स्थानिक पातळीवरील मतदारांचे समीकरण आणि अपक्ष लाट या लढतीत त्यांची परीक्षा घेणार आहे. याच तिरंगी स्पर्धेत दिपक इटणारे ‘किंगमेकर’ नव्हे, तर ‘किंग’ ठरू शकतात, अशी चर्चा प्रभागभर रंगली आहे. जनतेच्या प्रश्नांवर सातत्य, भ्रष्टाचार, अन्याय आणि प्रशासनातील त्रुटींवर निर्भीड पत्रकारिता, पक्षीय दबावापेक्षा लोकांशी थेट नाळ तरुण मतदारांमध्ये प्रचंड पोहोच. या सर्व मुद्द्यांमुळे त्यांची लोकांमध्ये ओळख ‘उमेदवार’ म्हणून नव्हे तर स्वच्छ प्रतिमेचा प्रतिनिधी म्हणून निर्माण झाली आहे. भाजप व काँग्रेस या दोन्ही पक्षांचे मत पारंपरिक पद्धतीने विभागले जात असताना, अपक्ष दिपक इटणारे यांच्या भोवती एक वेगळी लाट निर्माण होताना दिसत आहे. जुन्या पक्षांमधील संघर्षामध्ये ‘विश्वासार्हता विरुद्ध परंपरा’ अशा शैलीतील ही लढत होत आहे. एका बाजूला जुने चेहरे व पक्षीय समीकरणे, तर दुसऱ्या बाजूला तळागाळातला लढवय्या पत्रकार अशी ही निवडणूक जनतेला नव्या पर्यायाची शक्यता दाखवते आहे. प्रभाग १५-ब मधील हे समीकरण पाहता, तिरंगी लढतीत सर्वाधिक चर्चेत आणि निर्णायक प्रभाव करणारा चेहरा दिपक इटणारे ठरत असून, या प्रभागात यंदा ‘अपक्ष लाट’ नवा इतिहास लिहू शकते, अशी राजकीय गल्लीबोळातील चर्चा अधिकच जोर धरू लागली आहे.
